Ngjarja e ndodhur sot në plazhin e Shëngjinit rikthen në vëmendje një problem të përsëritur gjatë sezonit turistik, humbja e fëmijëve nga prindërit, mes turmave të pushuesve.Një vajzë 4-vjeçare nga Kosova u largua nga prindërit gjatë qëndrimit në plazh, duke shkaktuar panik tek familja.
Menjëherë pas njoftimit të marrë nga Salla Operative e DVP Lezhë, shërbimet e Policisë së Rendit në Shëngjin nisën kërkimet në terren. Falë reagimit të shpejtë dhe koordinimit, e mitura u gjet në një zonë të plazhit, në gjendje të mirë shëndetësore, dhe iu dorëzua familjes.Prindërit falënderuan policinë për profesionalizmin, por rasti ngriti edhe një herë alarmin për kujdesin që duhet treguar në hapësirat e mbipopulluara të plazheve.
Ekspertët e sigurisë bregdetare theksojnë se humbja e fëmijëve është një fenomen i zakonshëm gjatë verës, sidomos në ditët me fluks të madh, kur distanca mes prindërve dhe fëmijëve mund të bëhet fatale për pak minuta.
Policia e Shtetit u ka bërë apel të gjithë pushuesve që të mos i humbin nga sytë fëmijët, të shmangin largimin e tyre vetëm në breg dhe, nëse ndodh një rast i tillë, të njoftojnë menjëherë shërbimet e rendit.
Ky episod në Shëngjin përfundoi me një fund të lumtur, por mbetet një kujtesë e fortë se siguria e fëmijëve në plazh kërkon vëmendje të vazhdueshme dhe veprim të menjëhershëm në çdo situatë të ngjashme.
©️zërionline
