Gjykata e Durrësit la në qeli pa afat Ardian Halilin, njeriun dhe ish-funksionarin publik që me të gjitha mënyrat e mjetet dyshohet se përfitoi nga detyra. Në Gjykatë sapo përfundoi seanca për caktimin e masës së sigurisë ndaj ish-kreut të Inspektoratit të Mbrojtjes së Territorit, 55-vjeçarit Ardian Halili.
Pasi dëgjoi palët, gjyqtari Paulin Çera, caktoi masën e sigurisë “Arrest në burg” për Halilin, i arrestuar pak ditë më parë nga policia e Durrësit, përballet me tre akuza “Ndërtim i paligjshëm me qëllim përfitimi”, “Korrupsion i zyrtarëve të lartë” dhe “Shpërdorim i detyrës”.
Seanca gjyqësore vjen një ditë pas shembjes së kompleksit të tij “Saint Michelle Residence” në zonën e Shetaj, Ishëm, në Kepin e Rodonit. Shembja u krye me shpërthim të kontrolluar dhe më pas me fadroma.
Gjykata caktoi masën e sigurisë për Halilin, çështja e të cilit ka tërhequr vëmendjen e opinionit publik për shkak të përmasave të ndërtimit pa leje, abuzimit me detyrën dhe aferave të mundshme korruptive.
©️zërionline
