Një 44-vjeçare nga Durrësi ka rënë në prangat e Policisë së Sarandës, pasi akuzohet se ka përfituar një shumë parash përmes shantazhit dhe kërcënimeve ndaj një gruaje nga Saranda.
Sipas njoftimit zyrtar të Policisë, specialistët e Seksionit për Hetimin e Krimeve ndaj Pasurisë, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Sarandë, finalizuan operacionin për ndalimin e shtetases Z. H., 44 vjeçe, banuese në Durrës, e shpallur më parë në kërkim.
Hetimet u nisën pas kallëzimit të një 39-vjeçareje nga Saranda, e cila kishte deklaruar se ishte shantazhuar dhe kërcënuar përmes rrjeteve sociale.
Autorja e dyshuar i kishte marrë fillimisht 5000 euro, ndërsa vijonte ta kërcënonte për t’i marrë edhe 50 000 euro të tjera.
44-vjeçarja akuzohet për veprën penale “Shtrëngim me anë të kanosjes ose dhunës për dhënie pasurie”, parashikuar nga neni 109/b i Kodit Penal.
Materialet procedurale i janë referuar Prokurorisë për veprime të mëtejshme hetimore.
©️zërionline
