“Oborri Mbretëror Shqiptar” ka njoftuar zyrtarisht sot fejesën e Lartmadhërisë së Tij, Princit të Kurorës Leka II i Shqiptarëve, me zonjushën Blerta Celibashi.
Ceremonia e fejesës është zhvilluar më 11 tetor 2025 në Ksamil, në jug të Shqipërisë, në një atmosferë të ngrohtë familjare, në praninë e të afërmve dhe miqve më të ngushtë të çiftit.
Në njoftimin zyrtar, Familja Mbretërore shprehet se ndan këtë gëzim me popullin shqiptar dhe falënderon të gjithë ata që kanë përcjellë urimet dhe dashamirësinë e tyre në këtë rast të veçantë.
Fejesa e Princit Leka II shënon një moment të rëndësishëm për Familjen Mbretërore Shqiptare, duke rikthyer vëmendjen tek tradita dhe simbolika që kjo familje përfaqëson.
Martesa e mëparshme e Princit Leka II me artisten Elia Zaharia përfundoi zyrtarisht në vitin 2023, pas disa vitesh bashkëjetese. Çifti ka një vajzë, Geraldinën e vogël. Ndarja u shoqërua me tensione, pasi Princi bëri publike episode dhune të ndodhura në fund të martesës, duke e mbyllur kështu një kapitull që për një kohë kishte qenë në qendër të vëmendjes së publikut dhe mediave.
©️zërionline
