Triumf i madh për boksin shqiptar në një nga skenat më prestigjioze të sportit botëror. Jurgen Uldedaj është shpallur kampion bote në kategorinë “cruiserweight” të IBO-s, pas një përballjeje të fuqishme ndaj kamerunasit Rolly Lambert Fogoum në “O2 Arena” të Londrës.
Boksieri kuqezi dominoi duelin nga fillimi në fund, duke u vlerësuar nga gjyqtarët me vendim unanim: 120-108, 118-110, 119-109, rezultate që konfirmuan epërsinë e tij të padiskutueshme në ring.
Të dy sportistët u treguan taktikë dhe të kujdesshëm gjatë gjithë ndeshjes, por Uldedaj u imponua falë agresivitetit dhe ritmit të lartë veçanërisht në raundet e para, ku hodhi bazat e fitores. Me shpërthime të fuqishme dhe teknikë të pastër, ai neutralizoi kundërshtarin dhe e detyroi të dorëzohej ndaj avantazhit të tij.
Ky sukses e ngjit 27-vjeçarin me origjinë nga Lezha në majën e botës, duke e futur zyrtarisht në elitën e peshave të mesme të rënda. Një arritje historike për sportin shqiptar, që e rikthen flamurin kuqezi në skenën më të lartë të boksit profesionist.
©️zërionline
