Një ngjarje tragjike ka ndodhur në fshatin Mlizë të Elbasanit, ku një 35-vjeçar ka humbur jetën pasi u mor nga prurjet e përroit që kalon pranë zonës. Viktima është identifikuar si Flori Tahiri, 35 vjeç. Ai dyshohet se ka qenë në gjendje të dehur në momentin e aksidentit.
Sipas burimeve nga vendngjarja, Tahiri dyshohet se ka humbur ekuilibrin dhe është rrëmbyer nga uji. Për shkak të reshjeve të ditëve të fundit, niveli dhe rrjedha e përroit ishin rritur ndjeshëm, duke e bërë zonën më të rrezikshme.
Kërkimet kanë vijuar gjatë gjithë natës nga ekipet e zjarrfikësve dhe ato të emergjencave civile të Elbasanit. Trupi i 35-vjeçarit u gjet në orët e para të mëngjesit të sotëm, disa metra larg vendit ku dyshohet se ra në ujë.
Grupi hetimor po punon për zbardhjen e plotë të rrethanave të ngjarjes, ndërsa trupi i viktimës është dërguar për ekzaminime të mëtejshme.
©️zërionline
