Tjetër sherr i dhunshëm mes adoleshentëve. Ngjarja vjen disa ditë pas dhunës mes 2 grupeve të adoleshentëve pranë shkollës së mesme “Shejnaze Juka”, në Shkodër. Ky episod u regjistrua të premten mes disa të miturve, të cilët mbanin në dorë edhe thikë, por fatmirësisht nuk pati të lënduar.
Adoleshentët konfliktohen fillimisht me grushta, por një prej pjesëmarrësve në konfrontim mban në dorë një thikë.
Të përfshirët në konflikt mësohet se janë nga zona e Vaut të Dejës. Ngjarja ka ndodhur pas orës së mësimit, kur të miturit kishte lënë takim për t’u “sqaruar” mes njëri-tjetrit, tek vendqëndrimi i furgonëve.
I mituri pasi nxjerr thikën vendos kapuçin e xhupit në kokë dhe tenton të godasë rivalët në përplasje.
Për fat të mirë nuk pati të plagosur. Ka qenë ndërhyrja e një gruaje e cila ka shpërndarë të miturit disi duke ulur tensionet mes tyre. Është lajmëruar policia e cila ka mbërritur në vendngjarje, por ka munguar plotësisht bashkëpunimi për dhënien e informacionit, qofshin nga nxënësit që ndodheshin aty dhe kanë parë sherrin, por edhe nga shoferët e furgoneve.
Thika në dorën e nxënësit duket e madhësisë së armëve të ftohta luftarake, ndërsa nga të dhënat mësohet se konflikti kishte disa ditë që kishte nisur.
Më 25 nëntor një tjetër sherr mes të miturish në Durrës pëfundoi me vdekjen e 15-vjeçarit Erion Boba qe u godit disa herë me thikë në zemër e trup nga një 14-vjeçar.
©️zërionline
