Netët festive sjellin dhe dyndje të rasteve që përfundojnë në urgjencë për të kërkuar ndihmë mjekësore. “Janë djem e vajza. Vitet e fundit numri i vajzave të dehura është shtuar ndjeshëm.”, thonë mjekë të urgjencës në Tiranë dhe Durrës, qytetet më të mëdha në vend.
Kjo sepse për shumë të rinj shqiptarë, festat e fundvitit janë sinonim i argëtimit pa kufij. Por pas pamjeve festive dhe muzikës së lartë, fshihen rreziqe reale: konsum i tepruar i alkoolit, aksidente rrugore, dhunë dhe pasoja shëndetësore që shpesh nënvlerësohen.
Çdo fundvit shënon një rritje të incidenteve që përfshijnë të rinjtë, duke e kthyer gëzimin në gjendje të rënduar shëndetësore dhe ndonjeherë në drama të vërteta.
Alkooli si “kusht” feste
Në Shqipëri, po jo vetëm, alkooli është pjesë e pandashme e festës. Për shumë të rinj, refuzimi i alkoolit shihet si përjashtim nga grupi. Konsumi i pakontrolluar, shpesh që në moshë të vogël, rrit rrezikun e aksidenteve dhe sjelljeve të dhunshme.
Statistikat e viteve të fundit tregojnë se netët festive janë ndër më problematiket për emergjencat spitalore dhe policinë.
Rruga, rreziku më i madh
Një nga pasojat më të rënda të festave janë aksidentet rrugore. Drejtimi i mjetit nën ndikimin e alkoolit mbetet një nga shkaqet kryesore të tragjedive që përsëriten çdo fundvit.
Për jo pak familje shqiptare, festa ka përfunduar në spital ose në mort.
Presioni për “festë ekstreme”
Rrjetet sociale ushqejnë idenë se festa duhet të jetë e tepruar, e zhurmshme dhe e rrezikshme për t’u quajtur argëtim. Kjo i shtyn të rinjtë drejt sjelljeve impulsive, shpesh pa menduar për pasojat.
Argëtimi kthehet në provë guximi, jo në zgjedhje të vetëdijshme.
Më shumë përgjegjësi, më pak hipokrizi
Ekspertët kërkojnë më shumë ndërgjegjësim, por edhe më shumë alternativa të sigurta për të rinjtë. Festa nuk duhet të lidhet domosdoshmërisht me rrezikun, sepse gëzimi i vërtetë nuk matet me sa shumë rrezikon, por me faktin që kthehesh i sigurt në shtëpi.
©️zërionline
