Në mbledhjen e radhës të Këshillit Bashkiak të Durrësit, drejtuar nga kryetarja e Bashkisë Emiriana Sako, u miratua buxheti për vitin 2026, i cili, sipas Sakos, parashikon vijimin e punëve dhe investimeve të rëndësishme në shërbim të qytetit dhe qytetarëve.
Gjatë kësaj mbledhjeje u zgjodh edhe drejtuesja e re e Këshillit Bashkiak, Denisa Luarasi, si dhe zv.kryetarja Joniada Musaraj, të cilave kryebashkiakja u uroi suksese në ushtrimin e detyrës.
Krahas buxhetit vjetor, Këshilli Bashkiak miratoi edhe një sërë vendimesh të rëndësishme, mes tyre Programin Buxhetor Afatmesëm 2026–2028, si dhe sistemin e taksave dhe tarifave vendore për vitin 2026.
Në fokus të veçantë ishte edhe mbështetja sociale, ku u miratua ndihma financiare për disa familje të dëmtuara nga përmbytjet e shkaktuara nga reshjet intensive të shiut gjatë muajit janar 2025. Po ashtu, u miratuan ndryshime në vendimet e mëparshme të Këshillit Bashkiak lidhur me vlerën financiare të shpronësimeve për pasuritë private që preken nga investimi publik për rikonstruksionin e një rruge në njësinë administrative Ishëm.
Vendimet e marra përfshinë gjithashtu miratimin e listave të familjeve përfituese të ndihmës ekonomike, si dhe të familjeve që do të përfitojnë nga programi i kredisë së lehtësuar për strehim me interes 3%. Në të njëjtën mbledhje u miratua paraprakisht edhe lista e zonave prioritare të zhvillimit në territorin e Bashkisë Durrës, në përputhje me parashikimet e ligjit nr. 20/2025 “Për paketën e maleve”.
Në fushën e arsimit, Këshilli Bashkiak dha dritën jeshile për listën emërore të nxënësve të arsimit parauniversitar që plotësojnë kriteret ligjore për përfitimin e bursave dhe pagesave për vitin shkollor 2025–2026.
Vendimet e miratuara synojnë të nxisin zhvillimin ekonomik, përmirësimin e infrastrukturës dhe forcimin e mbështetjes sociale për shtresat në nevojë, duke reflektuar prioritetet e Bashkisë së Durrësit për vitet në vijim.
Vijon…
©️zërionline
