Nën tingujt e këmbanave dhe dritën e shpresës që sjell Lindja e Krishtit, besimtarët e krishterë në Durrës e në të gjithë vendin kremtuan Krishtlindjen me solemnitet, lutje dhe bashkim shpirtëror. Ortodoksë, katolikë dhe ungjillorë iu drejtuan kishave të qytetit për të marrë pjesë në meshat dhe shërbesat e shenjta, duke e kthyer këtë festë në një moment reflektimi, paqeje dhe dashurie njerëzore.
Ceremonitë nisën me meshën e mesnatës në kishën famullitare “Shën Domeniku” dhe atë “Shën Luçia”, një nga kulmet e festimeve të Krishtlindjes, ku u përcoll mesazhi i paqes, shpresës dhe fillimit të ri. Paraditen e sotme, shërbesa dhe mesha e Krishtlindjes u mbajtën edhe në kishën ortodokse “Apostull Pavli dhe Shën Asti”.
Edhe në kishat ungjillore të Durrësit, besimtarët u mblodhën në shërbesat festive në lutje, adhurim dhe reflektim, duke kërkuar paqe, udhëzim hyjnor dhe forcë shpirtërore për jetën e përditshme.
Pas meshave, urimet e ngrohta, përqafimet dhe fjalët e shpresës mbushën ambientet e shenjta, duke e kthyer Krishtlindjen në një festë që afron njerëzit me njëri-tjetrin dhe i rikthen te vlerat më të larta të besimit, dashurisë dhe solidaritetit njerëzor.
©️zërionline
