Detaje të reja tronditëse dalin nga banorë të zonës lidhur me ngjarjen e rëndë të regjistruar në Orikum, ku dhuna në familje përfundoi në vrasje dhe vetëvrasje.
Sipas informacioneve të fundit, Llogora Xhebroj, 50 vjeç, i cili dyshohet se dhunoi për vdekje bashkëshorten e tij Sose Bozhani Xhebroj, 40 vjeçe, ishte në proces divorci me të. Burime bëjnë me dije se marrëdhënia mes çiftit kishte qenë e tensionuar prej kohësh, ndërsa procedurat ligjore për ndarjen ishin në vijim.
Ngjarja ka lënë pas një dramë edhe më të rëndë familjare, pasi çifti kishte dy djem, një 18-vjeçar dhe një 16-vjeçar, të cilët tashmë përballen me humbjen e të dy prindërve brenda pak minutash.
Sipas të dhënave paraprake, konflikti i fundit mes bashkëshortëve ka degjeneruar në dhunë ekstreme, me pasoja fatale për gruan, e cila nuk arriti t’i mbijetojë plagëve të marra. Pas kësaj, autori i dyshuar i krimit i ka dhënë fund jetës me armë zjarri.
Grupi hetimor dhe Prokuroria po vijojnë hetimet për të zbardhur plotësisht rrethanat e ngjarjes, përfshirë dinamikën e konfliktit, historikun e dhunës në familje dhe nëse ka pasur më herët denoncime apo masa mbrojtëse.
Ngjarja në Orikum rikthen sërish alarmin për dhunën në familje dhe pasojat shkatërruese që ajo lë pas, veçanërisht për fëmijët, të cilët janë viktimat e heshtura të këtyre tragjedive.
©️zërionline
