Në rrugën “Taulantia” të qytetit të Durrësit, tre individë janë proceduar penalisht për shfrytëzimin e dy hapësirave publike si parkime të paligjshme. Këta persona i merrnin qytetarëve para për parkimin e automjeteve në hapësira që në të vërtetë janë pa pagesë.
Sipas njoftimit të policisë, intensifikimi i punës në terren dhe kontrollet gjatë sezonit veror kanë çuar në zbulimin e kësaj veprimtarie të paligjshme ekonomiko-financiare. Specialistët për hetimin e krimeve ekonomike konstatuan se M. V., 34 vjeç, A. V., 39 vjeç, dhe R. H., 24 vjeç, po shfrytëzonin në kundërshtim me ligjin dy vendparkime automjetesh në këtë rrugë.
Materialet për këto raste u referuan në Prokurori, ku nisi procedimi në gjendje të lirë për këta shtetas. Ata akuzohen për veprat penale “Punësimi i paligjshëm”, “Fshehja e të ardhurave”, “Moslëshimi i kuponit tatimor” dhe “Mospagimi i taksave dhe tatimeve”.
Policia njofton se kontrollet dhe bashkëpunimi me qytetarët do të vazhdojnë për të goditur çdo formë të paligjshmërisë në këtë fushë.
@zërionline
