Takimi i Kryeministrit Edi Rama me banorët e Durrësit të prekur nga projekti TID këtë të shtunë u mbyll pas shumë diskutimesh. Në fund të takimit, kreu i qeverisë e cilësoi bisedën si konstruktive, por theksoi qartë se projekti nuk do të pezullohet dhe se prishjet e parashikuara do të realizohen.
Rama bëri të ditur se do të rishikohet vlera e shpronësimeve dhe do të verifikohen disa objekte që mund të kenë vlera historike apo arkitekturore për qytetin. Sipas tij, për këto raste do të kryhen vlerësime të posaçme, të cilat mund të ndikojnë në vendimmarrjen përfundimtare. Megjithatë, ai nënvizoi se zbatimi i projektit do të vijojë sipas planit dhe shembjet janë pjesë e pashmangshme e tij.
Nga ana tjetër, banorët kërkojnë pezullimin e vendimeve për prishje të nxjerra nga bashkia dhe Inspektorati i Mbrojtjes së Territorit, deri në përfundim të rishikimit të projektit. Ata paralajmëruan se, nëse vendimet nuk anulohen, nuk do të largohen nga banesat dhe do të ngujohen në to.
Një tjetër çështje e ngritur gjatë diskutimeve ishte ajo e pronave që nuk janë pajisur me dokumentacion hipotekor, pasi ndodhen në zonën arkeologjike A dhe nuk janë lejuar të legalizohen. Ky problem prek familjet dhe statusin e pronës së tyre.
Pas takimit u bë e qartë se, pavarësisht kundërshtive, projekti do të ecë përpara, ndërsa verifikimet dhe procedurat do të përcaktojnë se cilat objekte do të preken dhe në çfarë mase. Protesta e një pjese të banorëve pas përfundimit të takimit solli edhe ndërhyrjen e policisë, e cila shoqëroi tre persona në komisariat.
©️zërionline
