Kryeministri Edi Rama, gjatë promovimit të librit “Kur heshtja flet” nga Prof. Dr. Ahmet Shala, akademik dhe ish-ambasador i Kosovës, deklaroi se Vjosa Osmani është kërcënuar sepse nuk lejoi që prokurorët të dhunonin zyrën e Presidencës së Kosovës.
Sipas kryeministrit, “prokurorët donin të dhunon zyrën e Presidentit se me demek do gjenin prova për krime kundër njerëzimit”.
Rama shtoi se presidenti i Kosovës, Hashim Thaçi, është marrë peng dhe se procesi ka nisur me raportin e famshëm të Dick Marty-t për trafikim të organeve nga udhëheqësit e UÇK-së, i cili u përdor si bazë për një plan afatgjatë që vazhdon deri sot.
Kryeministri shpjegoi: “Sipas kërkesës së prokurorisë së tribunalit në Hagë, këtyre të dënuarve do t’u shtohen edhe katër të tjerë në anën tjetër të barrikadës, ndërkohë që prokuroria nuk pati kapacitetin të provojë asgjë të ngjashme, pasi nuk ka në aktivitetin e katër udhëheqësve të UÇK-së. Nuk ka asnjë lidhje aktiviteti i tyre dhe UÇK-së me terrorin, pastrimin etnik, varre me njerëz të pafajshëm, shënjestrimin e fëmijëve dhe grave, apo me përdhunime, vrasje, mbytje njerëzish në lumë. Ata katër burra nuk u armatosën për të ndërtuar një politikë shfarosjeje, por kundër një politike shfarosjeje. Nuk u armatosën për të imponuar sundimin e tyre në një territor të huaj, por për të hequr qafe sundimin e të huajve në tokën e tyre.”
Rama theksoi gjithashtu se: “Presidentja e Kosovës është kërcënuar; ju nuk e dini, pasi nuk është thënë asnjëherë. Presidentja e Kosovës është kërcënuar sepse nuk ka lejuar që prokurorët të dhunonin zyrën e institucionit të Presidentit të Kosovës se me demek do kërkonin edhe aty provat e krimeve kundër njerëzimit. Kërcënimi i Presidentes ka zgjatur dy vjet, por për nderin e saj dhe nderin e Kosovës, ajo e ka ndaluar një gjë të tillë.”
©️zërionline
