Një ngjarje e rëndë është shënuar mbrëmjen e sotme në aksin rrugor Lushnjë–Fier, në afërsi të fshatit Rrapëz, ku një 70-vjeçar ka humbur jetën si pasojë e një aksidenti.
Sipas të dhënave paraprake, Skënder Maledhi, i cili po lëvizte me biçikletë, është përplasur nga një automjet taksi, ndërsa po tentonte të kalonte në anën tjetër të autostradës. Përplasja ka qenë fatale dhe i moshuari ka ndërruar jetë në vendngjarje si pasojë e plagëve të marra.
Menjëherë pas njoftimit, në zonë kanë mbërritur shërbimet e Policisë dhe grupi hetimor, të cilët kanë nisur veprimet për dokumentimin e plotë të rrethanave të aksidentit. Drejtuesi i mjetit, Genc Shahini, 52 vjeç, është shoqëruar për veprime të mëtejshme procedurale.
Në vendin e ngjarjes kanë mbërritur edhe familjarët e viktimës, në gjendje të rënduar emocionale.
Burimet policore bëjnë me dije paraprikisht se aksidenti dyshohet të ketë ndodhur në kushte errësire, me dukshmëri të kufizuar, ndërsa hetimet vijojnë për të sqaruar plotësisht shkaqet dhe përgjegjësitë e kësaj tragjedie.
©️zërionline
