Situata në Lindjen e Mesme është jashtë kontrollit, pas sulmit të koordinuar dhe të pritur nga amerikanët dhe izraelitët kundër Iranit të shtunën në mëngjes.
Sulmi fillestar kundër Iranit shënjestroi kryeqytetin Teheran dhe të paktën 7 zona të tjera të vendit, siç e ka hartëzuar Al Jazeera.
Prania amerikane në Lindjen e Mesme ka qenë e fortë në dekadat e fundit dhe kohët e fundit është përforcuar në pritje të sulmit. Sipas një grafiku nga rrjeti arab, afërsisht 40,000 deri në 50,000 ushtarë janë të stacionuar në 19 vende në rajonin më të gjerë, duke përfshirë Qipron dhe Turqinë.
Irani u përgjigj duke nisur sulme kundër Izraelit, duke zgjeruar më vonë operacionin e vet me ato që i quajti sulme të synuara në vende në rajonin e Gjirit.
Baza Ajrore Al-Udeid në Katar, Baza Ajrore Al-Salem në Kuvajt, Baza Ajrore Al-Dhafra në Emiratet e Bashkuara Arabe dhe baza e pestë amerikane në Bahrein janë shënjestruar nga sulmet me raketa iraniane, sipas agjencisë iraniane të lajmeve Fars.
Ndërkohë, mediat izraelite raportuan se shefi i Shtabit të Ushtrisë Iraniane, Amir Khatami, u vra në një seri sulmesh ajrore izraelite në Iran, megjithëse autoritetet iraniane ende nuk e kanë konfirmuar informacionin.
“Amir Khatami, komandant i ushtrisë së Republikës Islamike të Iranit, është eliminuar”, raportohet, megjithatë pa pasur ndonjë deklaratë zyrtare që konfirmon informacionin.
Kanali 12 i Izraelit raportoi se një nga objektivat e sulmeve ajrore këtë mëngjes ishte Ali Shamkhani, një këshilltar i Khameneit dhe përgjegjës për programin bërthamor.
Gholam-Hossein Mohseni-Ejei, kreu i gjyqësorit të Iranit, thuhet se u vra gjithashtu gjatë sulmeve. Mohseni-Ejei më parë mbikëqyrte gjyqësorin e Iranit, i cili është përballur me kritika ndërkombëtare për dënimet e ashpra të dhëna gjatë shtypjes së protestave.
Ai thuhet se vendosi dënimin me vdekje për mijëra protestues.
©️zërionline
