Një veprim i konsideruar i rrallë për nga ndershmërie qytetare ka bërë që një shumë e konsiderueshme parash dhe dokumentesh të rëndësishme të kthehen sërish në duart e pronarit të tyre.
Ngjarja ka ndodhur në Sarandë, ku një qytetar ka gjetur një çantë të humbur dhe pa hezituar është paraqitur në komisariatin e policisë për ta dorëzuar.
Sipas Policisë, shtetasi me inicialet R. Sh. ka gjetur çantën gjatë ditës së djeshme dhe menjëherë është drejtuar në Komisariatin e Policisë Sarandë. Brenda saj ndodheshin dokumente personale të shtetases ukrainase me inicialet L. K., si dhe një shumë e konsiderueshme parash, rreth 17 mijë dollarë.
Falë veprimit të qytetarit dhe reagimit të shpejtë të policisë, u bë i mundur identifikimi dhe kontaktimi i pronarës së çantës. Sot, dokumentet dhe shuma e parave iu dorëzuan asaj.
Autoritetet e Policisë së Shtetit e kanë vlerësuar këtë veprim si një shembull të ndershmërisë dhe përgjegjshmërisë qytetare, duke theksuar se bashkëpunimi mes qytetarëve dhe policisë është thelbësor për forcimin e besimit dhe sigurisë në komunitet.
Policia falënderoi publikisht shtetasin R. Sh. për gjestin e tij, duke e cilësuar atë një shembull pozitiv që meriton të promovohet dhe të ndiqet nga të gjithë.
