Ngjarje të përsëritura dhe tejet shqetësuese janë regjistruar në një familje në Korçë, duke ngritur pikëpyetje të forta mbi reagimin e institucioneve sociale dhe mekanizmave të mbrojtjes së fëmijëve.
Prej muajsh, vijon saga e ngjarjeve në familjen Dhëmbi në lagjen nr. 14 të qytetit të Korçës.
Ditën e sotme, vajza e mitur e kësaj familje ka tentuar të hidhet nga kati i tretë i pallatit ku ajo banon me nënën dhe dy motrat e saj e një vëlla më të vogël në moshë. Në vendngjarje, e mitura u shpëtua nga një banor i lagjes i cili u gjend në momentin që e mitura po tentonte të hidhej nga ballkoni. Në vendngjarje shkoi policia dhe autoambulanca.
Brenda pak ditëve, dy motrat kanë tentuar t’i japin fund jetës. Sipas burimeve lokale, mesditën e kësaj të enjte ka qenë vajza e dytë që ka tentuar të hidhet nga pallati, ndërsa vetëm tri ditë më parë i njëjti veprim ishte ndërmarrë nga motra e madhe.
Por këto nuk janë rastet e para. Rreth pesë muaj më parë, sërish vajza e madhe ishte hedhur nga i njëjti pallat, duke i mbijetuar ngjarjes.
Përsëritja e këtyre episodeve në një hark kaq të shkurtër kohor e kthen situatën në një çështje alarmi social. Banorët, që kanë qenë dëshmitarë të ngjarjeve, shprehen se familja përballet me probleme të mëdha dhe se gjendja psikologjike e fëmijëve është e rënduar.
Në këto kushte, ata kërkojnë reagim të menjëhershëm nga strukturat e mbrojtjes së fëmijëve dhe shërbimet sociale, për të shmangur një tragjedi të mundshme dhe për të garantuar mbështetjen e nevojshme për këtë familje.
Fëmijët dhe nëna e tyre kanë nevojë për ndihmë në shumë aspekte, veçanërisht psikologjike dhe emocionale për të dalë nga ky qerthull ngjarjesh të rënda dhe atyre që i kanë sjellë këto si pasoja.
©️zërionline
