Një i dënuar ka humbur jetën në rrethana shëndetësore të përkeqësuara, pasi u transportua me urgjencë në spital.
Shtetasi Luan Bundo, i datëlindjes 01.07.1957, lindur dhe banues në Tiranë, i dënuar me 10 vite burg për “dhënie ndihmë për kalim të paligjshëm të kufijve” dhe “mashtrim”, ka ndërruar jetë mëngjesin e 22 prillit 2026.
Mësohet se 68-vjeçarit i kishte mbetur për të vuajtur edhe 5 vite dënim dhe vuante nga disa probleme serioze shëndetësore, mes tyre paraparezë inferiore, hipokalemi e rëndë, sëmundje ishemike të zemrës, hipertension arterial, aritmi, kardiomiopati hipertensive dhe diabet mellitus.
Sipas të dhënave nga drejtoria e burgjeve, ai është konstatuar me probleme shëndetësore në ambientet e institucionit ku vuante dënimin, ku fillimisht i është dhënë ndihma e parë mjekësore dhe më pas është transportuar me urgjencë drejt Spitalit të Fierit.
Rreth orës 08:20, mjekët kanë konfirmuar vdekjen e tij, ndërsa paraprakisht dyshohet se shkak ka qenë një arrest kardiak.
©️zërionline
