Një ngjarje e rëndë ka tronditur qytetin e Shkodrës, ku një 27-vjeçare ka humbur jetën vetëm pak orë pasi ishte bërë një apel urgjent për dhurim gjaku në ndihmë të saj.
E reja, shtetasja M.S., kishte sjellë në jetë binjakë, por gjendja e saj shëndetësore u përkeqësua menjëherë pas lindjes, duke e bërë të domosdoshëm sigurimin urgjent të gjakut të grupit 0 negativ. Apeli për ndihmë u përhap me shpejtësi në rrjetet sociale dhe media, duke nxitur reagim të menjëhershëm nga dhjetëra qytetarë që u mobilizuan për të dhuruar gjak.
Pavarësisht ndërhyrjes së mjekëve dhe solidaritetit të treguar nga qytetarët, 27-vjeçarja nuk arriti t’i mbijetojë gjendjes kritike.
Ngjarja ka prekur thellë opinionin publik, jo vetëm për fundin tragjik, por edhe për kontrastin e dhimbshëm mes ardhjes në jetë të dy foshnjave dhe humbjes së nënës së tyre vetëm pak orë më pas.
Rasti ka rikthyer në vëmendje edhe rëndësinë jetike të dhurimit vullnetar të gjakut, ndërsa familja e së resë përballet me humbjen e madhe.
©️zërionline
