Marrin zhvillim të ri hetimet për vrasjen e ndodhur në Memaliaj, ku mbeti i vrarë 30-vjeçari Endri Goxhaj. Pas shpalljes në kërkim të autorit të dyshuar Donaldo Nela, policia ka vënë në ndjekje edhe vëllain e tij, Mario Nela, i dyshuar se ka ndihmuar në largimin e tij pas krimit.
Sipas burimeve hetimore, dy vëllezërit dyshohet se janë arratisur drejt Greqisë, ndërsa strukturat ligjzbatuese po vijojnë operacionin për lokalizimin dhe kapjen e tyre.
Dyshimet janë se Mario Nela ka luajtur rol në largimin nga vendngjarja dhe mund të ketë ndihmuar autorin e dyshuar të shmangë ndjekjen e policisë, çka ka sjellë zgjerimin e hetimeve edhe ndaj personave që mund të kenë favorizuar arratisjen.
Nga ngjarja e një nate më parë humbi jetën Endri Goxhaj, ndërsa mbeti i plagosur edhe vëllai tjetër i autorit të dyshuar, i cili sipas burimeve ndodhet jashtë rrezikut për jetën.
Hetuesit po verifikojnë tashmë jo vetëm dinamikën e përplasjes që çoi në krim, por edhe përfshirjen e mundshme të personave të tjerë, në një dosje që po zgjerohet përtej autorit të dyshuar fillestar. Ndërsa kërkimet janë shtrirë edhe në vendin fqinj, pista e arratisjes drejt Greqisë mbetet aktualisht një nga pistat kryesore të hetimit.
©️zërionline
