Një grup banorësh të lagjes 15 në Durrës, të zonës ku ndodhi edhe aksidenti tragjik, janë mbledhur mbrëmjen e sotme përpara godinës së Bashkisë në një protestë të heshtur. Pjesëmarrësit kanë ndezur qirinj mbi shkallët e institucionit në shenjë homazhi për jetët e humbura.
Tubimi u zhvillua pa deklarata për mediat, duke përdorur heshtjen si formë revolte ndaj pushtetit vendor për mungesën e sigurisë në zonat e banuara. Ndërkohë gjatë paradites pranë Drejtorisë së Policisë Durrës u vendos një kurorë me lule me mesazhin “Merrni masa”.
Qytetarët kërkojnë ndërhyrjen e menjëhershme të autoriteteve për të rritur sigurinë në rrugë dhe komunitetin e tyre, për të siguruar kushtet e nevojshme infrastrukturore në lagje. Një tjetër tubim i ngjashëm është lajmëruar se do të mbahet edhe pasditen e nesërme.
