Në vijim të hetimeve dhe zbardhjes së rrethanave të ngjarjes së rëndë në Korçë, dalin në dritë detaje të reja mbi lëvizjet e të dyshuarit dhe mënyrën e organizimit të operacionit policor.
Autori i dyshuar Violand Braçellari, sipas burimeve policore, qe parë një ditë më parë në fshatin Boden, ku lëvizte lirshëm në zonë. Pas marrjes së informacionit, forcat e rendit kanë organizuar sot operacionin për kapjen e tij, duke u nisur nga të dhënat se ai ishte zhvendosur në një stan në zonë, ku mbante edhe bagëtitë dhe qëndronte bashkë me nënën e tij.
Burimet bëjnë me dije se i dyshuari, i konsideruar me rrezikshmëri të lartë dhe me precedentë të mëparshëm, ka arritur t’u shpëtojë disa operacioneve të RENEA-s gjatë viteve të fundit. Megjithatë, sipas të njëjtave burime, në këtë rast rrezikshmëria e tij nuk është vlerësuar në mënyrën e duhur nga strukturat vendore të Policisë së Korçës.
Paraprakisht mësohet se në ndërhyrjen e sotme kanë marrë pjesë vetëm 6 efektivë të forcave “Shqiponja”, një numër i kufizuar për një person të konsideruar të armatosur dhe të rrezikshëm.
Gjatë operacionit, situata ka dalë jashtë kontrollit, duke çuar në përplasjen fatale me armë zjarri, ku mbeti i vrarë një efektiv policie dhe u plagos një tjetër, ndërsa edhe autori i dyshuar u neutralizua dhe u arrestua pas shkëmbimit të zjarrit.
Autoritetet po hetojnë jo vetëm dinamikën e ngjarjes, por edhe planifikimin e operacionit dhe vlerësimin e rrezikut përpara ndërhyrjes.
©ZëriOnline
