Rolando Maran e nis dramë me kombëtaren shqiptare. Kuqezinjtë janë mposhtur me rezultatin minimal 0-1 nga Luksemburgu në ndeshjen e dytë miqësore të zhvilluar në stadiumin “Air Albania”, duke regjistruar humbjen e dytë radhazi pas disfatës me të njëjtin rezultat ndaj Izraelit të luajtur pak ditë më parë në kryeqytet.
Kuqezinjtë e nisën mirë takimin dhe krijuan rastin e parë të rrezikshëm që në minutën e katërt, kur Qazim Laçi provoi me një goditje nga kufijtë e zonës, por topi përfundoi jashtë, fare pranë shtyllës. Tre minuta më vonë, Nedim Bajrami depërtoi nga krahu i djathtë dhe pasoi në zonë për Laçin, i cili nuk arriti të devijonte topin drejt rrjetës.
Megjithatë, në minutën e tetë erdhi edhe goditja për Shqipërinë. Dardari kaloi mbrojtjen shqiptare në krah dhe shërbeu në qendër për Sinanin, i cili përfitoi dhe dërgoi topin në rrjetë, duke i dhënë avantazhin Luksemburgut.
Pas golit të pësuar, kuqezinjtë u përpoqën të reagonin. Në minutën e 19-të, Kristjan Asllani provoi me një goditje të fortë nga distanca, por portieri mik priti pa probleme. Pjesa e parë u mbyll me epërsinë minimale të Luksemburgut, ndërsa Shqipëria nuk arriti të konkretizonte rastet e krijuara.
Edhe në fraksionin e dytë, skuadra shqiptare kërkoi golin e barazimit. Në minutën e 51-të, Arlind Ajeti lëshoi një pasim interesant për Myrto Uzunin, i cili tentoi portën, por aksioni u anulua për pozicion jashtë loje. Një minutë më vonë, Luksemburgu rrezikoi nga goditja e dënimit me Karlsonin, por pa gjetur kuadratin.
Asllani provoi sërish në minutën e 57-të me një tentativë ambicioze nga gjysmëfusha, duke parë portierin kundërshtar të avancuar, por topi nuk gjeti portën. Në anën tjetër, Sinani ishte pranë golit të dytë në minutën e 62-të, por Thomas Strakosha Sherri reagoi saktë për të mbajtur Shqipërinë në lojë.
Në minutat e fundit, kuqezinjtë ushtruan më shumë presion. Taulant Seferi pati dy raste me kokë pas harkimeve në zonë, por fillimisht gjeti portierin e më pas nuk arriti të drejtonte topin në kuadrat. Ndërkohë, në minutën e 73-të, V. Til provoi me një goditje të rrezikshme nga krahu i djathtë, por Sherri ndërhyri saktë duke devijuar në goditje nga këndi.
Pavarësisht përpjekjeve deri në fund, Shqipëria nuk arriti të ndryshonte rezultatin dhe u largua nga fusha me një tjetër humbje minimale 0-1, duke lënë ende shumë pikëpyetje përpara angazhimeve të ardhshme.
©ZëriOnline
