Pas alarmit të shkaktuar nga rrëshqitja e dherave në lagjen nr. 1 të Currilave në Durrës, autoritetet bëjnë me dije se situata aktualisht paraqitet e stabilizuar dhe nuk raportohet për rrezik të menjëhershëm për banorët apo kalimtarët.
Sipas burimeve nga Emergjencat Civile të Prefekturës së Qarkut Durrës, zona do të vijojë të jetë e rrethuar dhe nën monitorim të vazhdueshëm. Është vendosur një perimetër sigurie për të shmangur çdo incident të mundshëm, pasi terreni kodrinor paraqet paqëndrueshmëri.
Gjatë ditës së nesërme, të hënën më 8 qershor, pritet ndërhyrja e Forcave të Armatosura, në bashkëpunim me ekspertë të Institutit të Ndërtimit dhe të Gjeologjisë, të cilët do të angazhohen në largimin e dherave dhe pishave të dëmtuara nga rrëshqitja.
Vetëm pas përfundimit të kësaj faze do të kryhet një vlerësim i plotë i terrenit, i cili do të shërbejë për përcaktimin e masave konkrete që do të merren për trajtimin dhe stabilizimin afatgjatë të zonës.
©ZëriOnline
