Pas aksidentit tragjik në fillim të muajit të kaluar ku humbën jetën dy fëmijë, Policia Rrugore e Durrësit ka intensifikuar kontrollet në akset kryesore rrugore dhe në pikat hyrëse e dalëse të qytetit, duke përdorur pajisje inteligjente monitorimi me synim parandalimin e aksidenteve dhe menaxhimin më efikas të trafikut.
Bilanci i muajit të fundit tregon një angazhim të shtuar të strukturave të qarkullimit rrugor, ku për shkelje të ndryshme të Kodit Rrugor janë arrestuar ose proceduar penalisht 29 shtetas, ndërsa janë vendosur gjithsej 11.373 masa administrative.
Sipas të dhënave të Policisë, një nga prioritetet kryesore të kontrolleve ka qenë evidentimi dhe ndëshkimi i drejtuesve të automjeteve që qarkullojnë nën efektin e alkoolit, një ndër shkaqet më të zakonshme të aksidenteve rrugore me pasoja të rënda. Vetëm gjatë muajit maj, 25 drejtues mjetesh u arrestuan për këtë shkelje.
Kontrollet në terren kanë evidentuar edhe një numër të lartë shkeljesh të tjera të rregullave të qarkullimit. Konkretisht, janë vendosur 2.581 masa për ndalim, pushim ose qëndrim të gabuar të mjeteve, 197 masa për mosvendosje të kaskës mbrojtëse, 305 për mosvendosje të rripit të sigurimit dhe 75 për përdorim të telefonit celular gjatë drejtimit të automjetit.
Po ashtu, Policia ka ndëshkuar 115 drejtues për përdorim të pijeve alkoolike, 190 për parakalime të gabuara, 94 për mosrespektim të këmbësorëve dhe 864 për shkelje të tjera të Kodit Rrugor.
Shifra më e lartë e masave administrative lidhet me tejkalimin e normave të lejuara të shpejtësisë, ku gjatë muajit janë vendosur 6.952 gjoba.
Policia Rrugore Durrës apelon ndaj të gjithë përdoruesve të rrugës që të respektojnë me rigorozitet rregullat e qarkullimit, duke theksuar se siguria rrugore është përgjegjësi e përbashkët dhe se zbatimi i ligjit mbetet një faktor kyç për mbrojtjen e jetës dhe shëndetit të qytetarëve.
©ZëriOnline
