Barcelona po përgatitet të përjetojë një ditë që do të hyjë në histori. Sot, më 10 qershor 2026, saktësisht 100 vjet pas vdekjes së Antoni Gaudít, Sagrada Família do të bëhet skena e një prej ngjarjeve më të rëndësishme që nga nisja e ndërtimit të saj. Bekimi dhe përurimi i Kullës së Jezu Krishtit, zemra simbolike e kryeveprës së arkitektit katalanas.
Ceremonia do të drejtohet nga Papa Leo XIV dhe do të shënojë kulmin e “Vitit Gaudí”, programit përkujtimor të organizuar për nder të trashëgimisë së njeriut që ndryshoi përgjithmonë historinë e arkitekturës.
Dita do të nisë me vendosjen e luleve pranë varrit të Gaudít në kriptën e Bazilikës. Më pas do të mbahet një meshë solemne, e ndjekur nga bekimi dhe përurimi zyrtar i Kullës së Jezu Krishtit, e cila tashmë është bërë pika më e lartë dhe më simbolike e Sagrada Família-s.
Përfundimi i kullës përfaqëson një moment historik në ndërtimin e monumentit që ka zgjatur më shumë se një shekull. Punimet nisën në vitin 2018 dhe arritën fazën përfundimtare në shkurt 2026, me vendosjen e pjesës së fundit të kryqit monumental. Me lartësinë prej 172.5 metrash, Sagrada Família është tashmë kisha më e lartë në botë.
Ngjarja do të kulmojë me një spektakël të veçantë ndriçimi mbi kullën dhe qiellin e Barcelonës, si një homazh vizual për vizionin dhe krijimtarinë e Antoni Gaudí-t. Një shekull pas vdekjes së tij, arkitekti katalanas vazhdon të frymëzojë botën me një trashëgimi që bashkon artin, besimin dhe natyrën në një mënyrë të pakrahasueshme.
©ZëriOnline
