Bordi i Transparencës ka përcaktuar çmimet e reja tavan për tregtimin e karburanteve në vend, të cilat hyjnë në fuqi këtë të shtunë, datë 13 qershor, ora 14:00. Sipas vendimit të fundit, çmimet do të reflektojnë ndryshimet në pikat e shitjes me pakicë dhe shumicë si vijon:
- Çmimi i shitjes me pakicë i naftës do të jetë jo më shumë se 183 lekë/litri, ndërsa për shitjen me shumicë jo më shumë se 171 lekë/litër.
- Çmimi i shitjes me pakicë të benzinës ulet në 170 lekë/litri, ndërsa për shitjen me shumicë në 158 lekë/litër.
- Nafta (gazoil) për sektorin e peshkimit do të tregtohet me 88 lekë/litër.
Sipas sqarimit të Bordit, aktualisht niveli i akcizës do të zbatohet i plotë (100%), pasi çmimet në tregun vendas mbeten nën kufirin e parashikuar nga Akti Normativ për reduktimin e kësaj takse (i cili aktivizohet vetëm nëse nafta kalon 220 lekë/litrin). Çmimet e reja do të jenë të vlefshme deri në mbledhjen e ardhshme të Bordit.
