Drejtuesi i SPAK, Klodian Braho, i ka bërë thirrje Kuvendit të gjejë një zgjidhje ligjore për statusin e prokurorëve të posaçëm pas përfundimit të mandatit 9-vjeçar, duke paralajmëruar se mungesa e një mekanizmi të qartë mund të cenojë vijimësinë e hetimeve dhe të humbasë ekspertizën e ndërtuar ndër vite.
Gjatë raportimit në Komisionin e Ligjeve për veprimtarinë e SPAK në vitin 2025, Braho tha se modeli aktual kushtetues, i cili parashikon mandat 9-vjeçar pa të drejtë riemërimi, ishte i përshtatshëm në fazën e ngritjes së institucioneve të reja të drejtësisë, por tashmë kërkon rivlerësim.
Sipas tij, përfundimi i mandateve nuk prek vetëm karrierën e prokurorëve, por rrezikon edhe ruajtjen e përvojës në hetimet komplekse, bashkëpunimin ndërkombëtar dhe luftën kundër korrupsionit e krimit të organizuar.
Braho prezantoi edhe bilancin e SPAK për vitin 2025. Institucioni ka hetuar 871 procedime penale, 4.9% më shumë se një vit më parë, ndërsa 216 çështje janë përfunduar. Nga 294 procedime të reja, 209 janë nisur me iniciativën e vetë SPAK, një tregues që, sipas tij, dëshmon rritjen e hetimeve proaktive dhe mbështetjen më të madhe te analizat financiare, krahas referimeve dhe kallëzimeve.
Një tjetër ndryshim lidhet me përdorimin e masave të sigurimit. Sipas Brahos, arresti me burg po përdoret gjithnjë e më shumë si masë e fundit, ndërsa numri i rasteve ka rënë me 53.4%, nga 236 në vitin 2024 në 110 gjatë vitit 2025.
Drejtuesi i SPAK theksoi se korrupsioni mbetet një nga sfidat kryesore, ndërsa grupet e krimit të organizuar po përdorin metoda gjithnjë e më të sofistikuara, përfshirë komunikimet e enkriptuara, transaksionet informale dhe investimet në pasuri të paluajtshme.
©ZëriOnline
