Shqipëria vijon të ketë një nga nivelet më të larta në rajon të të rinjve që nuk janë as në punë, as në shkollë dhe as në formim profesional. Sipas të dhënave më të fundit të INSTAT, 20,1% e të rinjve 15-29 vjeç klasifikohen si NEET (Not in Employment, Education or Training) gjatë vitit 2025, një përqindje gati dy herë më e lartë se mesatarja e Bashkimit Europian.
Brenda kësaj kategorie, 38,5% janë të papunë dhe kërkojnë aktivisht një vend pune, ndërsa pothuajse një në pesë (19,5%) janë jashtë tregut të punës për shkak të angazhimeve familjare, si kujdesi për fëmijët apo të afërmit.
Tregu i punës vijon të favorizojë më shumë meshkujt. Gati gjysma e meshkujve NEET (46,5%) janë në kërkim aktiv të punës, ndërsa tek femrat kjo përqindje është vetëm 31,9%.
Ndërkohë, një tjetër tregues nxjerr në pah kontrastin në tregun e punës. Ndërsa papunësia tek të rinjtë 15-24 vjeç mbetet shumë e lartë, në nivelin 21,5%, numri i personave mbi 65 vjeç që rezultojnë të punësuar është rritur me mbi 10 mijë brenda një viti, duke arritur në 130 mijë. Sipas INSTAT, shumica e tyre janë të vetëpunësuar në bujqësi dhe konsiderohen të punësuar edhe kur prodhojnë vetëm për nevojat e familjes.
Të dhënat tregojnë se, pavarësisht rritjes ekonomike, integrimi i të rinjve në tregun e punës mbetet një nga sfidat më të mëdha për vendin.
©ZëriOnline
