Më 28 qershor 2021, Bashkia Divjakë i dha me qira dy kompanive private 67 hektarë tokë, që aty të ndërtohen për 10 vite panele diellore. Por një hetim i nisur fillimisht nga Prokuroria e Fierit dhe më pas nga SPAK ka gjetur shkelje të rënda në këtë procedurë, e cila ka përfunduar në dyert e GJKKO me 4 të pandehur.
Prokurori Elvin Gokaj ka paraqitur kërkesën për gjykimin me akuzën e shpërdorimit të detyrës të ish-kryebashkiakut socialist të Divjakës, Fredi Kokoneshi, dhe tre zyrtarëve të tjerë të kësaj bashkie.
SPAK ka dalë në përfundimin se Kokoneshi dhe ish-vartësit e tij, Andi Bullari, Ledio Xharo dhe Dorian Spaho, kanë shpërdoruar detyrën pasi kanë manipuluar origjinën e sipërfaqes së dhënë me qira. Bëhet fjalë për tre pasuri shtetërore, me sipërfaqe totale rreth 67 hektarë, të cilat në regjistrat e Agjencisë Shtetërore të Kadastrës figuronin si tokë bujqësore në pronësi të shtetit. Sipas SPAK, ky status e pengonte përdorimin e tyre për investimin privat të dy kompanive, “AG Hpower & Construction”, në pronësi të Arben Gogës, dhe “Intex”, në pronësi të Eriola Osojës dhe Emisa Kimmich.
Kompanisë “AG Hpower & Construction” iu dha me qira një sipërfaqe prej 337.763 metrash katrorë, ndërsa kompanisë “Intex” 33.763 metra katrorë, të dyja me afat shfrytëzimi 10-vjeçar dhe me objekt ndërtimin e impianteve fotovoltaike.
Tre muaj e gjysmë para se të lidhte kontratat me këto dy kompani, Bashkia Divjakë i kërkoi Ministrisë së Bujqësisë ndryshimin e kategorisë dhe bonitetit të tokës, nga tokë e dedikuar për bujqësinë në tokë “pa fryt”.
Kjo lëvizje, sipas SPAK, përbën shpërdorim detyre nga ana e ish-kryebashkiakut në bashkëpunim me vartësit e tij, pasi procedura e dhënies me qira është kryer në kundërshtim me ligjin për toka që rezultonin të regjistruara si tokë bujqësore.
58-vjeçari Fredi Kokoneshi drejtoi Bashkinë e Divjakës për tetë vite, nga viti 2015 deri në vitin 2023.
©ZëriOnline
