Deti i cili ishte burimi i jetës së tij, u kthye në vendin e tragjedisë. Një peshkatar 61-vjeçar është gjetur i pajetë në ujërat pranë ishujve të Ksamilit, ndërsa dyshimet e para lidhen me motin e keq dhe stuhinë e fortë që përfshiu zonën mbrëmjen e kaluar.
Viktima është identifikuar nga policia si Mihal Zoi, banor i Sarandës.
Sipas të dhënave paraprake, dyshohet se 61-vjeçari mund të jetë mbytur si pasojë e kushteve të vështira atmosferike. Mjeti i tij lundrues është gjetur i fundosur, duke ngritur dyshimet se përmbysja e varkës mund të ketë ndodhur gjatë stuhisë.
Autoritetet po hetojnë për të zbardhur rrethanat e plota të ngjarjes. Krahas pistës së një mbytjeje aksidentale për shkak të motit të keq, po verifikohet edhe mundësia e vetëvrasjes, megjithëse ende nuk ka një përfundim zyrtar.
Pas tij mbetet një histori jete e lidhur ngushtë me detin. Mihal Zoi ishte i divorcuar dhe fëmijët e tij jetojnë në Greqi. Në Shqipëri, i vetmi familjar i afërt që rezulton të ketë pasur ishte motra e tij.
Për peshkatarët e zonave bregdetare, deti është njëkohësisht vendi i punës dhe i sakrificës. Çdo dalje në det mbart rrezikun. Këtë herë një nga njerëzit e detit nuk u kthye më në breg.
Policia vijon hetimet për të përcaktuar saktësisht se çfarë ka ndodhur në ato orë të stuhishme, kur dallgët morën me vete jetën e një njeriu që kishte kaluar shumë nga vitet e tij pranë detit.
©ZëriOnline
