Ka nisur procesi për zgjedhjen e tre anëtarëve të rinj të Këshillit të Lartë të Prokurorisë (KLP), një prej institucioneve më të rëndësishme të sistemit të drejtësisë, i cili ka rol kyç në garantimin e pavarësisë dhe funksionimit të organit të akuzës.
Sipas njoftimit të Prokurorisë së Përgjithshme, në përfundim të afatit ligjor për paraqitjen e interesit janë regjistruar gjashtë kandidatura për tre pozicionet që do të lirohen në dhjetor të këtij viti.
Për vendin që përfaqëson Prokurorinë e Përgjithshme kandidojnë Antoneta Sevdari dhe Kostaq Beluri.
Për përfaqësimin e Prokurorisë së Apelit të Juridiksionit të Përgjithshëm janë në garë Afërdita Ndoi dhe Irma Balli.
Ndërsa për vendin që përfaqëson prokuroritë e shkallës së parë kandidojnë Edina Kurti, prokurore në Durrës dhe ish-drejtuese e Prokurorisë së Beratit, e njohur për integritetin dhe profesionalizmin e saj,
si dhe Eloida Goxhi, prokurore në Tiranë, e cila synon të sigurojë një mandat të dytë në Këshillin e Lartë të Prokurorisë, pasi ka qenë më parë anëtare e këtij institucioni.
Në zbatim të ligjit nr. 115/2016 “Për organet e qeverisjes së sistemit të drejtësisë”, Prokuroria e Përgjithshme do të kryejë verifikimin e kushteve ligjore për secilin kandidat dhe, pas marrjes së informacionit nga institucionet përkatëse, do të shpallë listën zyrtare të kandidaturave.
Përzgjedhja e anëtarëve të rinj të KLP-së vlerësohet si një proces me peshë për të ardhmen e sistemit të drejtësisë. Ky institucion merr vendime të rëndësishme për karrierën, vlerësimin dhe disiplinimin e prokurorëve, ndaj integriteti, profesionalizmi dhe besueshmëria e anëtarëve të tij janë elementë thelbësorë për forcimin e shtetit të së drejtës dhe besimit të qytetarëve te drejtësia.
Mandati i tre anëtarëve aktualë të KLP-së përfundon më 18 dhjetor 2026, duke hapur rrugën për një përbërje të re të institucionit që do të ketë ndikim të drejtpërdrejtë në drejtimin e sistemit të prokurorisë në vitet e ardhshme.
©ZëriOnline
