Pesë kandidatë, 3 gra dhe dy burra, kanë shprehur interesi për pozicionin e prokurorit të përgjithshëm, për të zëvendësuar në këtë detyrë Olsian Çelën, të cilit mbaron mandati 7-vjeçar në dhjetor të këtij viti.
Ndër të parët që aplikoi, duke dorëzuar platformën e tij në Këshillin e Lartë të Prokurorisë, vjen nga radhët e prokurorëve të SPAK. Adnan Xholi prej 5 vitesh ushtron detyrën si prokuror pranë Prokurorisë së Posaçme, teksa ka mbajtur detyrën edhe ai drejtues seksioni për krimin e organizuar në kohën kur SPAK udhëhiqej nga Altin Dumani. Ai është prokuror karriere, me mbi 2 dekada në sistemin e drejtësisë.
Në garë është dhe Arta Marku, ish prokurore e përgjithshme e përkohshme, e cila më pas u zëvendësua nga Olsian Çela. Marku aktualisht ushtron detyrën në prokurorinë e Apelit Tiranë.
Dy kandidatë të tjerë janë nga Prokuroria e Tiranës, Rovena Zoto dhe Ylli Pjetërnikaj. Në garë është dhe Fatjona Memçaj, e cila ka qenë më herët drejtoreshë kabineti në prokurorinë e përgjithshme, ndërsa tani pjesë e Eurojust.
Aplikim dorëzoi edhe drejtuesi i prokurorisë Elbasan Kreshnik Ajazi, por u tërhoq nga gara në moment të fundit.
Afati i fundit i aplikimit ishte data 1 gusht, por duke qenë se ishte pushim, u zgjat afati deri mesnatën e kësaj të hëne për dorëzimin e aplikimeve të tjera.
Pas intervistimit të kandidatëve, KLP do të zgjedhë vetëm 3 prej tyre që do t’i përcillen Kuvendit të Republikës për të zgjedhur prokurorin e ri të përgjithshëm.
©ZëriOnline
