Në një fushë ku dominon konkurrenca globale dhe ku sfidat shtohen çdo ditë, një profesioniste shqiptare ka arritur një vlerësim të rrallë ndërkombëtar. Esmeralda Kazia është shpallur fituese e çmimit
“Cybersecurity Woman of the World 2026”, duke u bërë shqiptarja e parë që merr këtë titull.
Vlerësimi e rendit atë mes emrave më të spikatur të sigurisë kibernetike në botë, një sektor që sot konsiderohet thelbësor për mbrojtjen e infrastrukturave kritike, institucioneve dhe sistemeve dixhitale.
Karriera e Kazisë lidhet prej vitesh me sigurinë kibernetike në Shqipëri. Ajo ka mbajtur role drejtuese në këtë sektor dhe ka përfaqësuar vendin në forume e iniciativa ndërkombëtare, përfshirë takime dhe bashkëpunime me partnerë strategjikë si NATO dhe institucione të tjera të specializuara në mbrojtjen kibernetike.
Pas marrjes së çmimit, ajo e cilësoi këtë arritje si një përgjegjësi për të vijuar punën në forcimin e sigurisë dixhitale, ndërsa shprehu dëshirën që suksesi i saj të shërbejë si frymëzim për të rinjtë shqiptarë, veçanërisht për vajzat që zgjedhin të ndërtojnë karrierë në teknologji.
Ky është një prej atyre vlerësimeve që tejkalon suksesin individual, pasi sjell në vëmendje edhe potencialin e profesionistëve shqiptarë për t’u vlerësuar në skenën ndërkombëtare.
