Një seri zjarresh të dyshuara si të qëllimshme kanë shkaktuar dëme gjatë orëve të para të mëngjesit në Durrës, ku janë djegur 10 kazanë mbetjesh dhe janë dëmtuar nga flakët 3 automjete të parkuara.
Fillimisht, në rrugën “Enver Velja”, pranë shkollës 9-vjeçare “Kushtrimi i Lirisë”, flakët përfshinë 8 kazanë mbetjesh dhe më pas u përhapën te tre automjete të parkuara pranë tyre. Pak më vonë, edhe dy kazanë të tjerë u dogjën në dy pika të ndryshme të rrugës “Mujo Ulqinaku”, duke e çuar në 10 numrin total të kazanëve të shkrumbuar.
Zjarrfikësit ndërhynë dhe shuan flakët, ndërsa hetimet paraprake tregojnë se zjarret dyshohet të jenë të qëllimshme dhe të kryera nga i njëjti autor, i cili mendohet se ka lëvizur nga rruga “Enver Velja” drejt rrugës “Mujo Ulqinaku”, që kryqëzohet me të parën.
Policia vijon hetimet për identifikimin e autorit dhe zbardhjen e plotë të ngjarjes.
©ZëriOnline
