Një aksident i rëndë rrugor është regjistruar në aksin nacional Fier–Shegan, në zonën e njohur si “Pushimi i Shoferit”, pranë kryqëzimit të fshatit Toshkëz.
Sipas informacioneve paraprake, një automjet tip “Benz” dhe një furgon janë përplasur me njëri-tjetrin. Si pasojë e përplasjes, një person ka mbetur i plagosur rëndë.
I lënduari është transportuar me urgjencë drejt spitalit të Lushnjës, ku raportohet se ndodhet në gjendje të rënduar shëndetësore.
Nga goditja e fortë, furgoni ka dalë nga rruga dhe ka përfunduar në kanal.
Në vendngjarje kanë mbërritur shërbimet e Policisë Rrugore, të cilat po punojnë për dokumentimin e aksidentit, përcaktimin e shkaqeve të tij dhe menaxhimin e trafikut në këtë segment.
Aksi Fier–Shegan është një rrugë me fluks të lartë automjetesh, ndërsa banorët e zonës kanë ngritur vazhdimisht shqetësime lidhur me sigurinë rrugore.
Qarkullimi në akset kryesore është shtuar edhe gjatë sezonit veror, periudhë kur rritet ndjeshëm numri i automjeteve në lëvizje. Në këto kushte, drejtuesve të mjeteve u kërkohet kujdes i shtuar dhe respektim i kufijve të shpejtësisë, veçanërisht në segmentet me trafik të rënduar.
©ZëriOnline
