Gjykata e Durrësit ka caktuar masën e sigurisë “arrest në burg” pa afat për Melson Nelën, xhaxhai i 18-vjeçarit, kamarierit që u dhunua në hotel FLAR në Malin e Robit, Golem.
Pas përfundimit të seancës gjyqësore, avokati i Nelës, Ndriçim Troplini, tha se klienti i tij nuk ka pasur qëllim të hakmerrej ndaj personave të përfshirë në dhunimin e nipit.
Sipas mbrojtjes, një ditë pas plagosjes së 18-vjeçarit, Nela ka tentuar të heqë qafe një armë zjarri kallashnikov dhe municionet që i mbante prej vitesh në banesë, pasi kishte frikë se ndonjë prej familjarëve mund ta përdorte për t’u hakmarrë.
Avokati ka këmbëngulur se veprimi i Nelës nuk lidhet me një plan për hakmarrje, por me dëshirën për të shmangur një përshkallëzim të mundshëm të konfliktit brenda familjes.
Megjithatë, gjykata ka vendosur që Melson Nela të qëndrojë në burg, ndërsa hetimet për rrethanat e ngjarjes vijojnë.
©ZëriOnline
