Një ngjarje e rëndë ka ndodhur mbrëmjen e sotme në Kamëz, ku një 27-vjeçar ka humbur jetën pasi dyshohet se ra në kontakt me telat e një linje elektrike të tensionit të lartë.
Ngjarja ndodhi në rrugën “Adriatik”, në lagjen nr. 5. I riu, i identifikuar me inicialet R. T., ndodhej në banesën e xhaxhait të tij dhe po rregullonte depozitën e ujit mbi banesë kur dyshohet se ra në kontakt me telat e energjisë elektrike.
27-vjeçari pësoi dëmtime të rënda dhe u transportua rreth orës 20:00 në Spitalin e Traumës për ndihmë mjekësore.
Pavarësisht përpjekjeve të mjekëve për ta mbajtur në jetë, rreth orës 21:00 i riu ndërroi jetë si pasojë e dëmtimeve të marra.
Ndërkohë, autoritetet po vijojnë hetimet për të sqaruar rrethanat e plota të ngjarjes dhe dinamikën që çoi në vdekjen e 27-vjeçarit.
©ZëriOnline
