Një shekull pas lindjes së Tish Daisë, muzika shqiptare nuk mjaftohet vetëm me kujtimin e një prej emrave të saj më të rëndësishëm. Ajo vijon të shkruhet, të eksperimentohet dhe të kërkojë forma të reja.
Në kuadër të 100-vjetorit të lindjes së kompozitorit “Nderi i Kombit” Tish Daija, Teatri Kombëtar i Operës, Baletit dhe Ansamblit Popullor ka shpallur dhjetë veprat fituese të konkursit të krijimtarisë muzikore “Tish Daija”, në kategoritë “Muzikë Dhome” dhe “Kor A Cappella”.
Mes veprave të përzgjedhura janë “Folk Game for Five” e kompozitorit durrsak Hajg Zaharian, “Janino” e Serxho Beqos, “Fllad pranveror në bregdet” e Maksim Shehut, “Ëndërr” e Ajet Çekiçit dhe “Desha” e kompozitorit tjetër durrsak Ylli Ramzoti.
Lista vijon me “Vegim” të Niko Boçit, “Gjurmë” të Rei Kitës, “Dremit liqeri” të Blendiar Bytyqit, “Lamentation” të Dea Ahmas dhe “Attempt of Nuance” të Leutrim Sahitit.
Ky konkurs nuk është thjesht një homazh për një figurë të së kaluarës. Ai kërkon të shohë se çfarë ndodh sot me krijimtarinë muzikore shqiptare dhe kush janë ata që mund ta mbajnë gjallë dhe ta çojnë atë më tej.
I realizuar në kuadër të Fondit të Krijimtarisë, me mbështetjen e Ministrisë së Turizmit, Kulturës dhe Sportit, konkursi synon nxitjen e krijimtarisë së re dhe mbështetjen e kompozitorëve të muzikës së kultivuar shqiptare.
Veprat fituese nuk do të mbeten vetëm në partitura. Ato do të marrin jetë përmes interpretimit në Festivalin e Krijimtarisë Muzikore Shqiptare, projekt i TKOBAP-së.
Një mënyrë për të lidhur dy kohë, trashëgiminë e një kompozitori që la gjurmë në muzikën shqiptare dhe krijimtarinë e brezit që sot po përpiqet të shkruajë kapitullin e radhës.
Në 100-vjetorin e Tish Daisë, muzika vijon përpara.
©ZëriOnline
