Një shqiptar është arrestuar nga policia spanjolle, pasi në një anije me vela ku ai ndodhej u zbuluan rreth 2.1 tonë kokainë. Operacioni u zhvillua në ujërat e Oqeanit Atlantik, rreth 400 milje larg brigjeve të Galicisë, në Spanjë.
Sipas mediave spanjolle, bashkë me shqiptarin janë arrestuar edhe tre persona të tjerë, me shtetësi argjentinase, uruguaiane dhe kolumbiane, të cilët ndodheshin në bordin e anijes. Gjatë kontrollit, autoritetet sekuestruan 70 pako me kokainë, me një peshë totale prej rreth 2.100 kilogramësh.
Nga hetimet e deritanishme dyshohet se shtetasi shqiptar kishte rolin e një lloj “noteri” brenda rrjetit ndërkombëtar të trafikut të drogës. Sipas hetuesve, ai mbikëqyrte transportin dhe kontrollonte nëse ngarkesa po dërgohej sipas marrëveshjeve të grupeve kriminale që do ta merrnin atë.
Hetimet nisën që në muajin shkurt, kur autoritetet spanjolle vunë nën vëzhgim një anije me flamur polak, e cila ishte pikasur në portin e Roses, në Spanjë. Në korrik, anija u largua nga porti me sistemin e gjurmimit të çaktivizuar, duke shtuar dyshimet e autoriteteve për përfshirjen e saj në trafikun e lëndëve narkotike.
Pas bashkëpunimit dhe shkëmbimit të informacioneve me autoritetet britanike dhe amerikane, policia arriti ta lokalizonte anijen më 14 shtator në Oqeanin Atlantik, ku ndërhyri dhe arrestoi personat që ndodheshin në bord.
Në kuadër të operacionit është arrestuar edhe një shtetas kilian, i dyshuar se siguronte mjete lundruese për organizatat kriminale të përfshira në trafikun ndërkombëtar të kokainës.
Sipas autoriteteve spanjolle, rrjeti përdorte anije me vela për transportimin e sasive të mëdha të drogës dhe dyshohet se siguronte mjete lundrimi për grupe kriminale që vepronin në Europën Lindore dhe në Ballkan.
Hetimet vijojnë nën drejtimin e Gjykatës Kombëtare të Spanjës, ndërsa autoritetet nuk përjashtojnë arrestime të tjera.
©ZëriOnline
