Trupi i pajetë i 31-vjeçarit shqiptar Denaldo Maxhallaku është gjetur në fund të një pusi rreth 10 metra të thellë, në zonën e Longianos, në provincën e Forli-Cesenës, në Itali. Prokuroria ka nisur hetimet për vrasje, ndërsa dyshimet paraprake janë se i riu mund të jetë qëlluar me armë zjarri.
Trupi u zbulua në zonën e Via Felloniche, gjatë kërkimeve të karabinierëve për gjetjen e shqiptarit, i cili rezultonte i zhdukur prej disa javësh. Në operacion u angazhuan edhe njësi me qen kërkimi, ndërsa ekipet e shpëtimit ndërhynë për nxjerrjen e trupit nga pusi.
Sipas mediave italiane, pranë vendit ku u gjet 31-vjeçari janë zbuluar edhe gëzhoja pistolete, të cilat mund të ndihmojnë hetuesit në rindërtimin e ngjarjes. Dyshohet se trupi ndodhej në pus prej disa ditësh.
Denaldo Maxhallaku kishte humbur kontaktet me familjarët e tij në Itali. Kontakti i fundit me të, sipas raportimeve mediatike, ishte regjistruar më 7 tetor 2026, rreth orës 20:30, në zonën e Savignano sul Rubicone.
Të nesërmen, më 8 tetor, automjeti i tij, një Fiat Punto e zezë, u gjet i djegur plotësisht në territorin e Roncofreddos, pranë lumit Rubicone dhe disa kilometra larg vendit ku u zbulua trupi.
Pas gjetjes së makinës, kërkimet u përqendruan në zonën mes Roncofreddos dhe Soglianos, përgjatë rrugës provinciale 85, e njohur si Fondovalle Rubicone. Në operacion morën pjesë karabinierë, zjarrfikës, ekipe me qen kërkimi dhe vullnetarë.
Prokuroria e Forlit, nën drejtimin e prokurorit Enrico Cieri, po heton rastin si vrasje të mundshme. Rrethanat e sakta të vdekjes, motivi i mundshëm dhe personat që mund të jenë të përfshirë mbeten ende për t’u përcaktuar.
Gjetja e trupit pritet t’u japë hetuesve të dhëna të reja për të rindërtuar lëvizjet e fundit të 31-vjeçarit dhe për të sqaruar lidhjen mes zhdukjes së tij, automjetit të djegur dhe vdekjes.
