Policia greke ka arrestuar 26-vjeçarin shqiptar Romarjo Tahiraj, të shpallur në kërkim ndërkombëtar për vrasjen e Spartak Dervishit në Selanik, në vitin 2020. Arrestimi u krye në kuadër të operacionit të koduar “The Wanted”, pas bashkëpunimit mes Interpol Tiranës dhe Interpol Athinës.
Sipas hetimeve, Tahiraj dyshohet se ka marrë pjesë në vrasjen e bashkëkombasit të tij së bashku me Orgel Xhambazin dhe Medi Ganollin, të cilët janë arrestuar më parë. Tre të dyshuarit fillimisht e kanë dhunuar viktimën dhe më pas e kanë goditur me mjete prerëse, duke i shkaktuar vdekjen.
Ngjarja ndodhi në Selanik në vitin 2020, ndërsa familjarët e Spartak Dervishit paraqitën kallëzim në Korçë. Pas kallëzimit, autoritetet shqiptare koordinuan veprimet hetimore me homologët grekë.
Në vitin 2021, Gjykata e Korçës caktoi ndaj Romarjo Tahirajt masën e sigurisë “Arrest në burg”, për veprën penale “Vrasja me dashje”, kryer në bashkëpunim. Pas këtij vendimi, Interpol Tirana e shpalli 26-vjeçarin në kërkim ndërkombëtar.
Policia e Shtetit njoftoi se autoritetet greke e kanë arrestuar provizorisht Tahirajn me qëllim ekstradimin drejt Shqipërisë.
Interpol Tirana dhe Interpol Athina po vijojnë procedurat për ekstradimin e tij, ndërsa 26-vjeçari do të përballet me akuzën e vrasjes me dashje, kryer në bashkëpunim, për ngjarjen e vitit 2020 në Selanik.
