Vendimi i marrë ditën e djeshme nga Gjykata e Apelit ndaj deputetit të Partisë Demokratike, Ervin Salianji, është votuar në mënyrë unanime nga të tre anëtarët e trupit gjykues.
Gjykata e Apelit ka reaguar në lidhje me vendimin e marrë më 26 shtator për deputetin demokrat Ervin Salianji, duke përgënjeshtruar lajmet e rreme, sipas saj, në portale. Ky vendim la në fuqi vendimin e shkallës së parë, për dënimin me 1 vit burg për çështjen Babale.
“Nisur nga disa kërkesa lidhur me vendimin e djeshëm (çështja ndaj të pandehurve Ervin Salianji, etj), ju njoftojmë se vendimi është marrë në unanimitet”, thuhet në reagimin e gjykatës.
Pas vendimit, reagime të shumta kanë ardhur nga opozita në mbështetje të deputetit demokrat. Ndërkaq Këshilli i Mandateve duhet të konstatojë përfundimin e mandatit dhe më pas Salianji do të izolohet në qelitë e burgut për të vuajtur dënimin.
Përveç humbjes së mandatit të deputetit, Salianji bazuar në ligjin e dekriminalizimit nuk e ka më të drejtën të kandidojë në 5 vitet e ardhshme për zgjedhjet parlamentare.
Situata e krijuar çoi dhe në zhvillimin e mbledhjes së grupit parlamentar dhe Kryesisë së PD-së, ku vendimi u konsiderua si një luftë e hapur ndaj opozitës, ndaj dhe u vendos që në 6 tetor të nisin protestat në vend.
©️zërionline
