Në kuadër të Ditës Ndërkombëtare të Shkopit të Bardhë, komuniteti i të verbërve në Durrës ngriti zërin për të drejtat dhe nevojat e tyre përmes një marshimi simbolik drejt bashkisë së qytetit. Me parulla që kërkonin “Integrim, Dinjitet, Integritet”, ata përcollën një mesazh të qartë: përmirësimi i kushteve të jetesës së këtij komuniteti nuk mund të presë më.
Sfida të përhershme me infrastrukturën dhe sinjalistikën
Marshimi, i organizuar nga shoqata “Shpresë për të Verbërit”, u kthye në një tribunë për të ngritur shqetësimet që i prekin çdo ditë personat me këtë status. Sajmir Farrici, presidenti i shoqatës, theksoi se mungesa e infrastrukturës së përshtatshme dhe e sinjalistikës akustike vazhdon të jetë një pengesë e madhe për lëvizjen e pavarur. Për të ilustruar rëndësinë e sinjalizimit zanor, të verbrit improvizuan një semafor akustik gjatë marshimit, duke tërhequr vëmendjen e kalimtarëve.
Jonuz Metaj, kryetar i shoqatës në Durrës, theksoi sfidat e përditshme të 300 anëtarëve të kësaj shoqate në Durrës dhe nevojën për një qytet të aksesueshëm edhe prej tyre, si dhe mbështetje ekonomike.
Lindita Kurtaj, e cila ka statusin e të verbrit si pasojë e tensionit të lartë, shprehet e pakënaqur me mbështetjen financiare të pamjaftueshme nga shteti, ndërsa sfidat në përditshmërinë e saj janë të shumta.
Pjesëmarrësit ngritën gjithashtu çështjen e mungesës së trotuarëve të përshtatshëm dhe shirita vizues që do të ndihmonin në orientimin e tyre. Indrit Losi, një nga pjesëmarrësit, foli për rrezikun e përhershëm nga rrugët e dëmtuara dhe trotuaret me gropa, duke kërkuar të paktën mbushjen e tyre me cakull për të shmangur aksidentet.
Përtej qytetit, sfidat janë edhe më të mëdha
Situata paraqitet edhe më e rëndë për të verbrit që jetojnë në fshatra, ku infrastrukturat janë edhe më të papërshtatshme. Madje as nuk bëhet fjalë për to. Edhe rrugët janë të paasfaltuara, u shpreh Indrit Losi, duke vënë në dukje dhe vështirësitë e përballimit të shpenzimeve për pajisje dhe shërbime që mund të lehtësojnë jetën.
“Një hap i vogël, si mbushja e këtyre gropave, do të ishte një ndihmë e madhe për ne,” shtoi ai.
Apel për ndërgjegjësimin e institucioneve dhe shoqërisë
Në Durrës, rreth 800 persona kanë statusin e të verbërit dhe përballen me sfida të përditshme për të jetuar me dinjitet dhe pavarësi. Duke marshuar në qendër të qytetit, ky komunitet kërkoi jo vetëm përmirësimin e infrastrukturës, por edhe ndërgjegjësimin e shoqërisë për të drejtat e tyre.
Të verbrit durrsakë nuk kërkojnë lëmoshë, por një qytet më të arritshëm dhe një jetë më të pavarur për ta.
©️zërionline
