Përplasjet Qeveri-Drejtësi në shtetin fqinj përfshijnë dhe Shqipërinë si palë e tretë në çështjen e emigrantëve që do të vijojnë ecejaket mes ujërave të Adriatikut. Seksioni i imigracionit në gjykatën e Romës e ka deklaruar të paligjshme vendosjen e emigrantëve brenda qendrës italiane në Gjadër, Shqipëri. Sipas mediave italiane, vendimi i gjykatës erdhi si përgjigje ndaj masës së marrë më 17 tetor nga policia e Romës, që urdhëroi transferimin e 12 të huajve drejt kampit në Gjadër. Këta emigrantë janë pjesë e një grupi prej 16 personash nga Bangladeshi dhe Egjipti, të cilët u transportuan nga anija “Libra” e Marinës Italiane.
Gjykata ka urdhëruar rikthimin e 12 azilkërkuesve në Itali, duke argumentuar se ata nuk mund të qëndrojnë në qendrën e Gjadrit dhe as të lihen të lirë në territorin shqiptar. Vendimi i gjykatës mbështetet në faktin se dy vendet nga vijnë emigrantët, Bangladeshi dhe Egjipti, nuk konsiderohen të sigurta, duke marrë parasysh dhe një vendim të mëparshëm të Gjykatës Evropiane të Drejtësisë.
Megjithatë, vendimi i fundit i gjykatës nuk ndikon në kampet e ngritura në Shqipëri, pasi ato janë ndërtuar për refugjatët që mbërrijnë nga vendet e konsideruara të sigurta.
©️zërionline
