Gjykata e Durrësit ka lënë të lirë aktorin e humorit Rezart Veleshnja, i cili u ndalua nga Policia e Durrësit me akuzën për mashtrim. Ndalimi i tij u deklarua i paligjshëm nga gjyqtarja Besjana Garxenaj, ndërsa për të u vendos masa e sigurisë “detyrim paraqitjeje”. Aktori akuzohet për përvetësimin e një automjeti të një të njohuri, të cilin raportohet se e kishte shitur për shumën e 200,000 lekëve.
Në seancën e zhvilluar pasditen e sotme, Prokuroria kërkoi këtë masë sigurie, e cila e detyron Veleshnjën të paraqitet periodikisht pranë autoriteteve dhe shmang arrestin e mëtejshëm. Avokati mbrojtës i aktorit argumentoi se çështja është e natyrës civile, duke theksuar se nuk ekziston asnjë kontratë formale shitblerjeje për automjetin.
Rezart Veleshnja, gjatë seancës, e përshkroi ngjarjen si një “lapsus” dhe ofroi versionin e tij, duke e quajtur denoncimin një akt që synon cenimin e imazhit të tij. Sipas tij, konflikti lindi nga një ultimatum i të njohurit për kthimin e automjetit.
Ngjarja ka tërhequr vëmendje të madhe publike, për shkak të profilit të njohur të aktorit si një nga figurat më të spikatura të humorit shqiptar dhe pjesëmarrjes së tij së fundmi dhe në BBVip Kosova.
©️zërionline
