Shqipëria vijon të përballet me fenomenin e kontrabandës së barnave dhe përfshirjen e tyre në aktivitetet kriminale, përfshirë përgatitjen e lëndëve narkotike. Operacioni policor i koduar “Transit”, i finalizuar në Aeroportin e Rinasit, ka goditur një tjetër tentativë të kësaj natyre.
Operacioni, i zhvilluar nga Sektori për Hetimin e Krimeve Ekonomike dhe Financiare në bashkëpunim me Drejtorinë e Hetimit Doganor dhe Policinë Kufitare të Rinasit, nën drejtimin e Prokurorisë së Tiranës, çoi në arrestimin e 5 shtetasve kosovarë nga 20-46 vjeç, konkretisht B.Z., 45 vjeç; F.Z., 34 vjeç; A.I., 23 vjeç; A.G., 20 vjeç; dhe A.M., 21 vjeç.
Gjatë kontrollit në bagazhet e tyre, autoritetet sekuestruan 1 057 840 tableta, të dyshuara si të kontrabanduara dhe me peshë totale 417.1 kg, që dyshohet se përdoren për përgatitjen e lëndëve narkotike. Po ashtu, gjatë kontrollit fizik ndaj një prej të arrestuarve, B.Z., u gjet një shumë prej 300 000 eurosh, të padeklaruar në pikën kufitare, së bashku me 6 celularë.
Sipas hetimeve paraprake, këta shtetas dyshohet se i kishin blerë barnat në Jordani dhe kishin planifikuar t’i transportonin përmes Shqipërisë drejt Kosovës.
Operacioni “Transit” vjen si rezultat i një hetimi të mirëkoordinuar bazuar në informacione nga inteligjenca policore, duke rikthyer vëmendjen tek nevoja për forcimin e kontrollit kufitar për të parandaluar tregtinë e paligjshme të barnave dhe përfshirjen e tyre në veprimtari kriminale.
Materialet hetimore janë referuar Prokurorisë për veprime të mëtejshme, ndërsa hetimet vijojnë për zbardhjen e plotë të aktivitetit të grupit dhe rrugët e trafikut të barnave.
©️zërionline
