Një tjetër goditje ndaj krimit të rëndë në qytet. Operacioni policor i koduar “Distanca”, i organizuar nga Specialistët e Seksionit për Mbështetjen Operacionale të Hetimit në bashkëpunim me Policinë e Plazhit, ka rezultuar me arrestimin e një personi në kërkim. Falë informacionit të siguruar nga inteligjenca policore, u lokalizua dhe arrestua një 30-vjeçar, i akuzuar për tentativë vrasjeje.
Shtetasi Klenis Kazazaj, banues në Durrës, u ndalua në lagjen nr. 13, pas disa muajsh në arrati. Ai ishte shpallur në kërkim nga Gjykata e Shkallës së Parë Fier, që më 4 gusht 2023, e cila i kishte caktuar masën e sigurisë “Arrest në burg” për veprat penale “Vrasja me dashje”, mbetur në tentativë, dhe “Mbajtja pa leje e armëve”.
Sipas hetimeve, ngjarja për të cilën Klenis Kazazaj akuzohet ka ndodhur më 30 korrik 2023, në lagjen “Sheq i Madh” në Fier. Pas një konflikti të çastit për motive të dobëta, ai dyshohet se ka tentuar të vrasë shtetasin O. B., 34 vjeç, duke e plagosur rëndë me armë zjarri.
Materialet procedurale i janë kaluar Prokurorisë për veprime të mëtejshme, ndërsa procedurat për rastin do të ndiqen nga Drejtoria Vendore e Policisë Fier.
©️zërionline
