Një investim i ndërprerë në mes nga firma zbatuese dhe bashkia e Durrësit ka vënë në rrezik banorët e një zone në Spitallë të Durrësit, ku rrëshqitjet e tokës kërcënojnë shtëpitë dhe bizneset e tyre.
“Situata është shumë e rrezikshme për të gjithë banorët e kësaj lagjeje. Rrëshqitjet rrezikojnë të gjitha banesat e ndërtesat. Kërkojmë ndërhyrjen e bashkisë”, shprehet një prej banorëve.
Sipas tyre, problematika është përkeqësuar ndjeshëm pas reshjeve të fundit. “Sidomos pas shirave të fundit toka ka rrëshqitur më shumë. Çdo ditë e më keq”, thekson një tjetër banor.
Sipas tyre problemi u shkaktua në segmentin e kanalit të ujërave të larta që nuk është mbuluar nga bashkia, rreth 1.4 kilometra nga varrezat e reja deri te shkolla “Met Hasa” e Porto Romanos.
“Toka ka rrëshqitur dhe na rrezikon çdo ditë e më tepër. Sot ishin përfaqësuesit e bashkisë, po thonë se ndjehen të dobët për shkak të fushatës dhe nuk mund të ndërhyjnë.”
Banorët thonë se zgjidhja është betonimi i kanalit për të shmangur rrëshqitjet e mëtejshme, ndërsa situata nisi kur investimi i bashkisë në këtë kanal u la në gjysmë.
“Thanë që u mbaruan fondet, por shoh abuzim te firma dhe ata që kanë firmosur fondet. Filloi ndërtimi i lulishte mbi kanal kur kjo ishte emergjente. Nuk duhej të thellohej kanali. Pastrohej dhe s’ka pas probleme, por u thellua 4 metra dhe u la në mes. Punime jo cilësore dhe mungesë supervizimi”, thekson një nga banorët.
Ata kërkojnë një zgjidhje të menjëhershme për të shmangur një katastrofë të mundshme, ndërsa autoritetet vendore, Bashkia e Durrësit ende nuk ka dhënë një përgjigje konkrete për vazhdimin e punimeve.
©️zërionline
